تون جڳ جاڳائيندين

انساني سوچ، سمجهه، فهم ۾ مثبت هاڪاري رخ ۾ مسلسل اڳتي وڌڻ لڳي ته نه صرف انفرادي بلڪه ڪيترائي اجتمائي مقصد حاصل ڪري سگهجن ٿا. فطرت جي هن جهان ۾ شعور، ڄاڻ، حاصل ڪرڻ بعد ان جو اطلاق لازمي آهي. اهو عمل وارو جيڪڏهن درست رخ ۾ آهي ته انسان تي فطرت جا ڀال ٿيندا رهندا.  هو  نيون ڪائناتون کولي لهندو پر جيڪڏهن علم، ڄاڻ، صرف ڏيکاءَ ۽ رسمي پورائي لاءِ حاصل ڪيو ويو آهي ته ان جو مثال بيٺل پاڻيءَ مثل آهي.

جنهن مان نقصان جو انديشو ضرور آهي پر فائدو ڪو به ناهي. علي شيرازي جو هي ڪتاب ڪريئر ڪائونسلنگ سان واسطو رکي ٿو. شاگرد، توڙي عام پڙهندڙن لاءِ هن جيتري اهميت رکي ٿو. انسان کي هي جيڪي پساهن جا پل مليا آهن انهن کي ڪيئن گذارجي نظم ۽ ضبط ڪيئن رکجي ڇو رکجي وڌاءُ ۽ اهم سوال آهن. سمورا موضوع هڪٻئي سان جڙيل آهن ۽ سڀني جو بنياد ڪردار سازي، مقصد جي جستجو ۽ اسان جي شخصي تعمير آهي اسان جنهن معاشري ۾ رهون ٿا گهٽ ۾ گھٽ ان ۾ هن قسم جي ڪتاب جي سخت ضرورت آهي ڇاڪاڻ ته ترقي يافته سماجن ۾ هي ڳالهيون عملي طرح اڳ ئي موجود آهن.

زوال پذير، ڇڙوڇڙ، حيران پريشان، غربت، بک، بدحالي، بيروزگاري، سماج کي جنجهوڙي جاڳائڻ، انهن کي طرِز حيات ڪيئن ترتيب ڏيڻ گھرجي. کين اهو به ٻڌائڻ لازمي آهي. تعليمي، هنري ادارا به موجود آهن ٿورا يا گھڻا وسيلا به  موجود آهن ان باوجود سماج هر طرف کان وکريل آهي سڌاري ۽ ترقي وارو مقصد حاصل نه پيو ٿئي. افرادي قوت وڌڻ باوجود هر طرف کوٽ ئي کوٽ آهي هي ڪتاب وکريل ۽ مايوس سماج جي مضبوط تعمير ۽ ترتيب جي لاءِ هڪ ڪوشش آهي انسان قدرت جي اسرارن جو هڪ مجموعو آهي. پاڻ کي ڄاڻڻ، سڃاڻڻ  ۽ ان مطابق  پاڻ جو استعمال اسان جي سامهون ڪيترن ئي بند دروازن کي کوليندو ويندو. اهو تڏهن جڏهن انسان ان راهه تي هلڻ شروع ڪندو.

مير سردار چنڙ سنڌي شعبي جو نهايت، باصلاحيت ۽ ذهين شاگرد آهي. ننڍي عمر ۾ سندس هي علمي، ادبي ڪم کيس ضرور اڳتي وٺي ويندو. جتي هو ٻولي، ادب ۽ سماج لاءِ گھڻو ڪجهه ڪري سگهندو. سندس هي ڪاوش سماج جي بهتر تعمير، ترقي ۽ واڌاري لاءِ هڪ اهم قدم آهي. هي ڪتاب  نوجوانن کي ضرور پڙهڻ گھرجي. هن ۾ زندگي لاءِ رهنما اصول موجود آهن. جن جي هنن حالتن ۾ سخت ضرورت آهي.

ڊاڪٽر نواب ڪاڪا

سنڌي شعبو  
سنڌ يونيورسٽي  
ڄامشورو