سڀاڻي نه اڄ انشا الله
حضور اڪرم صلي الله عليه واله وسلم فرمائي ٿو ته : پنجن شين کي پنجن کان پھريان غنينت سمجھو زندگي کي موت کان پھريان,تندرستي کي بيماري کان پھريان, واندڪائي کي مصروفيت کان پھريان، جواني کي پيڙھي کان پھريان، مالدار کي فقير کان پھريان.
الله تعالي انسان کي بيشمار نعمتن سان نوازيو آھي جنهن جي سرفھرست ۾ وقت ۽ صحت آھي وقت انساني زندگي جو اھو قيمتي اثاثو آھي جيڪو شروع کان ھميشه تائين ھر انسان کي برابر بنا ڪنهن فرق جي عطا ڪيو ويو آھي. اھو وقت جو ئي استعمال ھوندو آھي جيڪو ڪنهن به انسان جي زندگي سڌارڻ يا بگاڙڻ جو اختيار رکندو آھي اڄ اسان پنهنجي معاشري ۾ نظر ڦيرايون ته اسان کي اندازو ٿيندو ته اسان مان اڪثريتي ماڻھو پنهنجو وقت ضايع ڪرڻ مصروف آھن. اسان کي اھو احساس ئي ناھي ته اسان کي ھر ايندڙ ڏينهن موت جي ويجھو ڪري رھيو آھي گويه اسان ناڪامين جي ڏاڪڻين تان لھندا پيا اچون اگر ڪڏهن غلطي ۾ يا معجزاتي طور اسان کي اھو احساس ٿي وڃي ته اسان ڪٿي بيٺل آھيون اسان ڇا حاصل ڪيو ڇا وڃايو اسان اڳيان ڪھڙي طريقي وڌي رھيا آھيون ته اسان کي پنهنجي اصلاح جي ھڪ اميد نظر اچي ويندي آھي جنهن سان اسان ۾ پاڻ کي تبديل ڪرڻ جو ھڪ جذبو پيدا ٿيندو آھي اسان بھتر پڪي وارا خواب سجائيندا آھيون محنت ڪرڻ جو عزم ڪندا آھيون. ۽ پوءِ انھن سڀني سٺين سوچن تي عمل جو ارادو ڪندي پاڻ سان مخاطب ٿي پاڻ چوندا آھيون . "سڀاڻي کان انشاءُالله "
ڪامياب زندگي جي سفر جو اھم ڏاڪو ته اھو آھي ته اوھان پاڻ سان مخاطب ٿي چئو ته : "سڀاڻي کان نه اڄ کان به نه پر ھن مھل سان ئي انشاءُالله"
مان ھر ايندڙ ڏينهن ان جو تجربو ڪندو آھيان ته اسان وٽ ماڻهو خواب ڏسندا آھن محنت جو ارادو ڪندا آھن عزم ڪندا آھن ته سڀاڻي کان ڦلاڻو ڪم ڪنداسين سڀاڻي کان محنت ڪنداسين سڀاڻي کان جدوجھد ڪنداسين پر اھا سڀاڻي سڀاڻي ڪڏهن ناھي ايندي. مان سمجھان ٿو اھي ماڻھو موت کان به ان لاءِ ڊڄندا آھن ڇو ته انھن پنهنجا اڪثر ڪم سڀاڻي تي رکيا آھن اڪثر اوھان ٻڌو ھوندو اھڙي ڪنهن شخص کي جڏهن چيو ويندو آھي ته نماز جي پابندي ڪيو توبه استغفار ڪندا ڪيو ٻارن سان وقت گذاريو ماءُ پيءُ کي وقت ڏيو پنهنجي صحت تي ڌيان ڏيو ورزش ڪندا ڪيو ايتري تائين چوندو ته روز پنهنجي پاڻ پرک (محاسبو)ڪندا ڪيو ته جواب ملندو آھي . انشاءُالله سڀاڻي کان ڪنداسين.
اڄ اسان جي معاشري ۾ ڪا شي سڀ کان وڌيڪ بيقدري جو شڪار آھي ته اھو وقت آھي.اھا بيقدري ۽ بي شڪري ايتري حد تائين وڌي وئي آھي جو ھاڻ ان کي برو سمجھڻ جي به تڪليف ناھي ڪئي ويندي. اسان ڪلاڪن جا ڪلاڪ فون تي ڳالھائيندي دوستن سان ھوٽلن تي بي مقصد ويھي ٻين مان عيب ڪڍندي تنقيد ۽ نڪته چيني ۽ گلا ڪندي سوشل ميڊيا تي ھروڀرو اسڪرولنگ ڪرڻ ۾ وقت ذيان ڪري ڇڏيندا آھيون. پر افسوس جڏهن سٺو ڪم ڪرڻ جو وارو ايندو آھي ته اسان سڀاڻي کان ڪنداسين انشاءُ الله جا ورد شروع ڪندا آھيون. نوجوان قوم جو مستقبل ھوندا آھن ۽ اسان جي نوجوان جن کي اڄ صحت سان نوازيو ويو آھي سڀاڻي خدا ڄاڻي! ڪيئن اڳيان وڌي سگھندا. ڪھڙن مرضن جو جو شڪار ھوندا اڄ مالدار آھن سڀاڻي نه ڄاڻ ڪھڙن حالتن جو شڪار ھوندا. ان لاءِ جيڪو ڪرڻو آھي ھاڻ ڪيو جيڪو ڪم ڪرڻو آھي جيڪو ڪمائڻو آھي جيڪي به فائدا کڻڻا آھن ھاڻي ڪري وٺو اھو ئي ڪاميابي جو راز اٿو ٻي صورت ۾ سڀاڻي اسان کي ڀڇتاء علاوه ڪجهه به حاصل نه ٿيندو.
منھنجي نظر ۾ ڪاميابي ته اھا آھي موت مٿان ھجي ۽ توھان کي ڪو به خوف ۽ پڇتاء نه ھجي توھان کلندي موت کي پنهنجي ڀاڪر ۾ ڀريو توھان کي اھڙي طرح فتح ڪيو جو مرڻ تائين اوھان کي پاڻ تي ۽ پنهنجي زندگي تسلي ھجي. الله کي منهن ڏيکارڻ جي قابل ھجو.