تا عمر قيد ٿي وئي آهي
زندگي ڀيد ٿي وئي آهي
ڪوڙڪي هن جي لئه وڇاڻي هئي!
بي سبب صيد1 ٿي وئي آهي
سون جئن سانڍيم محبت کي،
پوءِ به ناپيد ٿي وئي آهي!
ڳوليو جنهن کي شام صحرا ۾،
رڃ ۾ سا کيد2 ٿي وئي آهي.
هن جي جوڀن تان جان و جسم نثار،
جلد جاويد ٿي وئي آهي
دل ۾ تمثيل هُن جي آهي پڪي،
جام جمشيد ٿي وئي آهي.
تنهنجي لئه پيار جا سڪا ميڙيم،
هنجَ ڇو ڇيد ٿي وئي آهي!؟
درد آهي رتي اسانجي اک،
شام ڀي ريد3 ٿي وئي آهي.
ڪوڪ ڪويل جي آهه کاٽُ هنيو،
ياد نو پيد ٿي وئي آهي.
زندگي ڀر ڏنو زخم جنهن ٿي،
سا سکي ويد ٿي وئي آهي.
هاڻ امداد! شاعري تنهنجي،
ڄڻ وڌي بيد ٿي وئي آهي.
1. شڪار
2. ڌوڪو، دولاب
3. سرخي مائل