آزاد نظم
سالن کان پوءِ
سالن کان پوءِ اڄ آيو هان
آءٌ پڙهائڻ ٻارن کي هِت
هيءُ ڪلاس اُهو ئي آهي
جنهن ۾ پاڻ پڙهي وِيو آهيان
پنجون درجو......!
ديوارون به اُهي ئي آهن
جيڪي پوڙهيون ٿي وِيون آهن
مون ڏي اِيئن پيون واجهائن
ڄڻ ته پڇن ٿيون:
”سعيد ڪٿي هِن سنگتي تنهنجا؟
جيڪي توسان گڏ پڙهندا ها،
روز صبح جو گهنڊ سڏي ٿو
پر هُو هاڻي ڪين اچن ٿا!
تن کي چَهءُ ته گُسائن ڇو ٿا؟“
اکين ۾ آلاڻ ٿئي ٿي
آءٌ اُٿان ٿو
در وٽ بيهي
عينڪ لاهي
نيڻ اُگهان ٿو.
***