گينتنگ هائلينڊ جي ڪيبل ڪار ۾
جڏهن جاني انھن منظرن جي رڪارڊنگ ڪندي سنڌي ۾ ڪمينٽري شروع ڪئي ۽ هتان جي ملھار موسم جي باري ۾ ڳالھائڻ شروع ڪيو تہ ان مھل اسان سان گڏ ويٺل نوجوان جو صبر لبريز ٿي ويو. هن مداخلت ڪندي، اردو ۾ ڳالھائيندي اسان جو ڌيان پاڻ ڏانھن ڇڪايو ۽ چيو تہ،”معاف ڪجو، جڏهن هتي اُس نڪرندي آهي تڏهن اڃان بہ هتان جا منظر وڌيڪ چٽا ۽ موهيندڙ ٿي ويندا آهن ۽ گهڻو مزو تڏهن ٿيندو آهي جڏهن ڪارا ڪڪر هٽي ويندا آهن، آسمان صاف ٿي ويندو آهي، سج نڪري ايندو آهي ۽ هتان جي سڄي گرينري (ساوڪ) چٽي صاف ٿي ويندي آهي، ان مھل انھن نظارن تي توهان عاشق ٿي ويندو ۽ توهان کي وڏو مزو ايندو.“