منهنجي اچڻ ۾ دير ٿي وئي
يا منهنجي اچڻ ۾ وڏي دير ٿي وئي . . . ؟
پڙاڏو مان تنهنجي صدائن سندو هان
اهو سڏ آهيان جا وائي چئي وئين
مگر گونج آهيان،
اها ڪونج آهيان
جا تنهنجي نگر تي اڃان ڪُرڪندي آ
اڃان ڦڙڪندي آ
ستارا هزارين افق تان لهي ويا
ولر ڪيئي آيا اُتر کان ڪَهي ويا
سڄو لوڪ سانجھيءَ سمهي اڄ پيو آ
مگر منهنجي من ۾ ڪو ماتم متو آ
اڃان ٻول ڪيئي ٻُرايان پيو مان
اڃان تنهنجون وايون ٿو ڳايان پيو مان
کڻي جوڳ پنهنجو تون آخر رمي وئين
ڀٽائي تون مون کان اڳي ئي ڄمي وئين
يا منهنجي اچڻ ۾ وڏي دير ٿي وئي . . . ؟