ترارن جا تجلا
۽ ڌڌڪا منهنجي مارُن جا
هر بڙڇي بڻجي گيت وئي
نا ڌُڏيا پير ڪنڌارن جا
تاريخ لکي هت ويندي آ
هر دور جي ڪوسي رت منجھان
فانوس جلايا ويندا هِنِ
ڪنهن مور جي ڪوسي رت منجھان
مان جيل منجھاران جھپڪا ڏئي
هو تارا شاهد ٺاهيان ٿو
مون ڪهڙيون راتيون ڪيئن ڪٽيون
مان ڪهڙا گيت ٻڌايان ٿو
هوءَ نار رَلي جا ٺاهي پئي
هي ڳاڙها ڌاڳا رت هڻي
هوءَ تنهن تي گيت به ٽاڪي پئي
جي سرجيا مون هِنِ سَتُ هڻي
هي اوجاڳا ۽ ويڙهانديون
هي رت رچايون جي رانديون
سي رنگ ته آخر لائينديون
تاريخ وري بدلائينديون
هر بڙڇي بڻجي گيت وئي
سو پاڻياريون ئي ڳائينديون.