مدينه:
مدينه جي ماڻهن کي حضور صلعم جي اچڻ جي خبر پئجي چڪي هئي ۽ سڀ اوسيئڙي واري حالت ۾ هئا ٻار به خوشي ۽ جوش ۾ گهٽين پاڙن ۾ چوندا وتندا هئا ته ”اسانجا پيغمبر اچي رهيا آهن“ ننڍيون ننڍيون ڇوڪريون ڇتين تي چڙهي پاڻ سڳورن جي اچڻ جي خوشيءَ ۾ ڳيچ ڳائينديون هيون نوجوان هٿيار پهري شهر کان ٻاهر نڪري ويندا هئا ۽ پهرن جا پهر پاڻ سڳورن جي اچڻ جو اوسيئڙو ڪندا هئا هڪ ڏينهن هو اوسيئڙو ڪري واپس وريا ٿي پئي ته هڪ يهودي هڪ ننڍڙو قافلو ايندي ڏسي رڙ ڪئي اي ماڻهو! اوهين پيا جنهن جو اوسيئڙو ڪندا هئا اهو اچي ويو.اهو آواز ٻڌندي ئي شهر تڪبير جي نعري سان گونججي ويو ۽ مسلمان هٿيار پهري ٻاهر نڪري آيا اها ربيع الاول جي اٺين تاريخ ۽ نبوت جو تيرهون سال هو.