مذهب

رحمت عالم ﷺ

هي ڪتاب رحمتِ عالم صلي الله عليه وسلم، هن ڪتاب جو ليکڪ مشهور سيرت نگار سيد سليمان ندوي آهي.
اسين ٿورائتا آهيون اسلاميه سائنس ڪاليج سکر جي اسٽنٽ پروفيسر محترم عبدالجبار شيخ صاحب جا، جنهن هي ڪتاب ڪمپوز ڪري سنڌ سلامت تي پيش ڪرڻ جي اجازت ڏني آهي.
Title Cover of book رحمت عالم ﷺ

مڪه وارن جون سازشون ۽ شرارتون:

جيڪي مسلمان مڪه ڇڏي مدينه هليا آيا هئا مڪه وارن انهن جي گهرن ۽ ملڪيتن تي قبضو ڪري ورتو ۽ سڀ کان وڏي ڳالهه هي ڪيائون ته خانه ڪعبه ۾ اچڻ ۽ حج ڪرڻ به انهن لاءِ بند ڪري ڇڏيائون ڪو ويندو هو ته لڪي ۽ سر تريءَ تي رکي ويندو هو۽ جيڪي مسلمان يا ننڍا ٻار ۽ عورتون مدينه نه اچي سگهيا هئا انهن تي پهرو ويهاري ڇڏيائون ته جيئن وڃي نه سگهن.
رڳو ايتري تي ئي بس ڪانه ڪيائون پر اهو ڏسي ته هنن جا ڏوهاري يعني مسلمان سندن پهچ کان ٻاهر مدينه ۾ زور وٺي رهيا آهن هنن يهودين ۽ مدينه جي منافقن سان دعا سلام شروع ڪري ڏني ۽ انهن کي چوائي موڪليائون ته اوهان اسان جي ڀڳل ڏوهارين کي پنهنجن گهرن ۾ پناهه ڏني آهي.سٺو ائين ٿيندو تهانهن کي ڪڍي ڇڏيو نه ته اسين اچي اوهان جي شهر تي حملو ڪنداسين.