گيت گُناهگار نه هوندا آهن
سَڀُ ماڻهو تو وانگر سوچين.
ذهني آزادي
هر انسان جو حق آهي.
تون پنهنجي مخصوص فڪر جا اسٽيڪر
ماڻهن جي ذهنن تي چنبڙائي نٿو سگھين.
هر سچي فنڪار وانگر
هن جي سوچَ به آزاد آهي،
هُو تُنهنجي پرچار جي
پٽي پڙهڻ کان انڪار ڪري ٿو.
تون ڀلي ناراض ٿي
هُن جي راهن ۾ ڪنڊا ۽ پٿر
پکيڙي ڇڏ.
تو اُهو سڀڪُجھه ڪري سگھين ٿو
پر اهو تنهنجي وس ۾ ناهي
ته تون هُن جي گيتن کي
گناهگار بڻائي
چپن تي آڻڻ کان روڪين.
ڇوته گيت آزاد پکين جان هوندا آهن
جيڪي ننڍڙي ذهن جي سوچ کان گھڻو مٿي
اُڏامندا آهن
۽ مُحبتي دلين جي
آکيرن ۾ رهندا آهن.