آهِن گلاب کان وَڌِ، سُهڻا حَسين ماڻُهو
قنڌهار لاڙڪاڻي جا رنگ رنگين ماڻهو
مَڃڻو پيو حَسنين جو ديسُ لاڙڪاڻو
تعريف ڇا ڪَيان سڀ هت نازنين ماڻهو
ماڻهو سَچن، سُٺن جو آ ديسُ لاڙڪاڻو
دل ۾ رهن سدائين، اهڙا مَڪين ماڻُهو
چَهري منجهان سٻاجها، گُفتارَ ۾ پيارا
همدرد، بَا وَفا هِي مٺڙا اَمين ماڻهو
دِلدَارَ دوستي جا، قُربانُ دوستن تان
ياري رَکي نڀائڻ، هي عنبرين ماڻهو
مُضبوط ۽ بَهادُرَ، سُلطَانَ ۽ سِپاهي
ناياب ڄُڻ ته هيرا، زَمرد رنگين ماڻهو
ڪهڙا کَڻان مان نالا، هت ”زاهده“ هزارين
عالِمَ اَديبَ، حاڪِمَ، آهن ذهين ماڻهو