ڇا لِکان ڇا چَوان زندگي دَردُ آ
بي اثر بندگي دل لڳي درد آ
هر قدم حاڪمي، ساهه سان سِرُ قلم
درد جو دڳ نه ڪو، بيوسي درد آ
بي وفا الفتون، محفلون ماڻهپو
دِلِ ڇَڏي جُستجُو دوستي درد آ
ڀؤنر جي دلبري، بي بقا روپ سان
رنگ، گُل ڪا گهڙي، عاشقي درد آ
شال ڪو پل نه هڪ، ڌار ٿي اَڌُ ٿِئي
حسن جي عشق کان بيرُخي درد آ
سَارَ ٿي سُور ڏي قلب کي رات جو
رات ۾ چنڊ جي روشني درد آ
ڏيهه ۾ ظُلم جون، سختيون ٿا سَهون
”زاهده“ ڏاڍ جي، صاحبي درد آ
مشهور راڳي الله ورايو لانگاهه جو ڳايل