شل خير هجي
هن سنڌ جي سوني ڌرتيءَ ڏي،
الله رکيءَ، دل پرتيءَ ڏي،
۽ سونهن نگر جي سرتيءَ ڏي،
شل خير هجي - شل خير هجي.
هن ديس جي گل گلزارن ڏي،
سَن، سيوهڻ، ڀِٽ جي مزارن ڏي،
محبت جي مٺن آزارن ڏي،
شل خير هجي - شل خير هجي.
امڙين جي او لاڻن، لولين ڏي،
ٻارن جي نماڻين ٻولين ڏي،
ڀيڻن جي گلابي جهولين ڏي،
شل خير هجي - شل خير هجي.
شاگرد، مزور ۽ هاري ڏي،
هر درد ڏي هر دلداري ڏي،
۽ ڪنهن جي مرڪ ڪنواري ڏي،
شل خير هجي - شل خير هجي.
عاشق جي اڌورين آهُنِ ڏي،
محبوب جي ٻهڪيل ٻانهن ڏي،
۽ پيار ڏي ويندڙ راهن ڏي،
شل خير هجي - شل خير هجي.
8