شهيد هيمون ڪالاڻي
سکر جيل ۾ قيد،
شهيد هيمون ڪالاڻي،
ڦاهيءَ جي ڦندي کي چُمي،
پنهنجي اوچي ڳاٽ ۾،
وجهي رهيو هو،
ان ويلي- ڦاهيءَ جو ڦندو،
فخر سان اُوچو ۽ ويڪرو ٿي ويو هو.
هيمون ڪالاڻي جي امڙ،
پنهنجي حلالي پُٽ جي حب الوطني،
بهادري ۽ سورهيائيءَ کي،
سلام ڪندي،
وڏي فخر سان،
کيس پنهنجي سيني سان لائي،
پنهنجي ”مقدس ٿڃ“ بخشي هئي.
جنهن وڏي شان ۽ مان سان،
پنهنجي شهيد پٽ کي،
ڌرتي ماءُ جي جهوليءَ حوالي ڪيو هو.
تڏهن چندر شيکر آزاد،
ڀڳت سنگھ، سک ديو ۽ راج گرو،
کيس هزارين شهيدن جي جلوس ۾،
شاندار آجياڻو ڏنو هو.