سنڌ تنهنجون عاشقيون جاڳي پيون
سورمن جون سرڪشيون جاڳي پيون.
پاهڻن جا پنڌ جاڳيا، ڪونڌرن جا ڪنڌ جاڳيا،
موههَ جاڳيا، مَنڌ جاڳيا، مئه ڪشيون جاڳي پيون.
ڏاهرن جا ڏاهه جاڳيا، وطن جا ويساهه جاڳيا،
چيٽ جهڙا چاهه جاڳيا، چاهتون جاڳي پيون.
جوڌا جُنگ جوان جاڳيا، دودا، دريا خان جاڳيا،
ارڏا اڄ انسان جاڳيا، عظمتون جاڳي پيون.
آجپي جا گيت جاڳيا، سوڀ جا سنگيت جاڳيا،
من مُهڻا ميت جاڳيا، محبتون جاڳي پيون.
ڀونءِ جاڳي، ڀاڳ جاڳيا، سونهن جا سڀ ماڳ جاڳيا،
جاڳ جا سڀ راڳ جاڳيا، رهبريون جاڳي پيون.
باک اجرا رنگ جاڳيا، ديس جا سڀ دنگ جاڳيا،
ناچڻيءَ جا انگ جاڳيا، نرتڪيون جاڳي پيون.
نيڻ جاڳيا نينهن جاڳيا، سانورا سڀ شينهن جاڳيا،
مند جاڳي، مينهن جاڳيا، ساوڪون جاڳي پيون.
الستي آواز جاڳيا، سرمستيءَ جا ساز جاڳيا،
ادل ۽ اياز جاڳيا، جرئتون جاڳي پيون.
سنڌ تنهنجون، عاشقيون جاڳي پيون،
سورمن جون سرڪشيون جاڳي پيون.