سيد ابرهيم شاھه جتي ستي
حضرت ابراهيم شاھ جتي ستي، جو هڪ وڏو درويش صاحب ڪرامتن جو مالڪ هو، هي فقير هڪ جدا تڪيي ۾ رهندو هئو. هو نهايت سخي طبيعت وارو صاحب هوندو هو. پاڻ لعل شهباز جي فقيري کي اهڙو ته روشن ڪيو هئائون ۽ اهڙا ته قلندري سنت تي پابند هئا جو ڪيترائي درويش امامتن وارا سندن هٿ تي فقير ٿيڻ کي پنهنجو فخر سمجهي ڏينهن جا ڏينهن سندن حاضري ۾ ويٺا هوندا هئا(1).
”سيد ابراهيم شاھ جتي ستي اول ۾ شهباز قلندر جو پانڌيئڙو ۽ طالب هو شهباز جي وصال بعد سيد علي سرمست جي خدمت ۾ رهي سندس طالب ٿيو(2). هي بزرگ صاحب ڪرامت ۽ تمام ڪشاده دل درويش هو. جنهن مرشد جي وصال کان پوءِ جدا تڪيو ٺاهي، مريدن کي شهباز سائين جي طرز عمل تي هلڻ جي تلقين ڏين شروع ڪئي. پاڻ زندگي ڀر مجرد رهيو. رحمدل ڏاڍو هوندو هو. جنهن سندس فيض مان ڪيترن ئي فائدو ورتو (2).
مٿين حوالن مان معلوم ٿئي ٿو ته سڀني عالمن هڪ ٻئي تان اقتباس ورتو آهي. ڪنهن چٽي طرح نه لکيو آ، هي شخص ڪنهنجو فرزند هو ڪٿان آيو؟، طالب ڪڏهن ٿيو، سندس علمي فقهي ڪي ڪم به هيا! ڪڏهن جنم ٿيو، وفات ڪڏهن ڪيائين. سيوهڻ جي ڪجهه ماڻهن ۾ اها روايت پئجي وئي آهي، ته جنهن کي گذاري 50 سال مس ٿيا هوندا چوندا ته اهو بزرگ لعل شهباز سان گڏ آيو هئو. (3)
حضرت ابراهيم شاھ جتي ستي جو احوال سنڌ جي ڪنهن به اهم ڪتاب ۾ نه ملي سگهيو آهي. اڳين محققن روايتن جي اعتقاد تي لکيو جو قبول ڪري به سگهجي ٿو ته رد به ڪري سگهجي ٿو. حضرت ابراهيم شاھ جتي ستي پنهنجي دور اهل الله بزرگ ٿي گذريو آهي. سندس مزار جي مٿان هن وقت مقبرو ٺهيل آهي. هي مقبرو قلندر لعل شهباز جي درگاھ جي اتر ۾ موجود آهي. جتي ڪيئي عقيدتمند ايندا رهن ٿا.
مددي ڪتاب ۽ حوالا
1. سيوهاڻي جليل ”الشهباز“ ثقافت کاتو سنڌ 2012ع ص 96
2. سيوهاڻي خير محمد ٻرڙو ”سيوهڻ صدين کان“ مراد پبليڪشن سيوهڻ شريف 2009ع ص 117
3. سيوهاڻي سولنگي محمد پريل ”گلزار قلندر“ شهباز اڪيڊمي 1972ع ص 172