سيد وريل شاھه سبزواري
سيد وريل شاھ سبزواري ولد سيد مظفر شاھ سبزواري جو جنم 1901 ڌاري سيوهڻ شريف ۾ ٿيو. ابتدائي تعليم سيوهڻ مان حاصل ڪيائين بعد ۾ مختلف شهرن مان تعليم حاصل ڪيائين. سنڌ جي ساداتن مان پهريون گريجوئيٽ هو.
”شاھ صاحب درگاھ قلندر لعل شهباز جو سجاده نشين هو، سندس عزت ڀريو مقام هو. زمينداريءَ سان گڏو گڏ سياست به ڪندو هو. سيوهڻ ۽ پسگردائي جي ماڻهن جو ڀرجهلو ۽ ڪم ايندڙ شخص هو. جنهن ڪري پاڻ ٽي دفعا ٽائون ڪاميٽي (ميونسپل ڪاميٽي سيوهڻ کي 2016 ۾ درجو مليو آهي) جو چيئرمين پڻ رهيو. (1)
سيد وريل شاھ هڪ قتل سنڌ جي اڳوڻي وزيراعليٰ سنڌ سيد عبدالله شاھ لڪياري جنم (1934ع وفات 2007ع) جي والد سيد مراد علي شاھ واهڙ واري کي ڪيو هو. ڪتاب ”سيوستان کان سيوهڻ تائين“ جو ليکڪ قاضي آفتاب رضا مغل لکي ٿو ته:
”سيد وريل شاھُ سبزواري پستول کنيون، جيڪو چمڙي ڪور سان کٽ جي پائي ۾ لڙڪيو پئي. ان مان پستول ڪڍي پٺي ڀر ٿي پستول جي چرخي مان گوليون ڇنڊيائين پنج نڪري ويون ڇهين رڪجي وئي نشي ۾ سائين کي خبر ڪانه پئي سائين نوڪر کي ڊيڄاريندو رهيو، پستول جا خالي ٺڪاءَ ٿيندا رهيا. پستول ۾ اُن گولي جو نمبر آيو ته سائين وريل شاھ جي کٽ جي سامهون سيد مراد علي شاھ ويٺو هو. هن ڀيري جيڪو ٺڪاءُ ٿيو سو خالي نه هو. پستول مان گولي نڪتي جيڪا سڌي سائين مراد علي شاھ سينئر جي پيشاني ۾ لڳي. سائين کٽ تي ڪريو (2)، ڪجهه سال سيد وريل شاھ جيل ۾ رهيو بعد ۾ آزاد ٿي آيو. 1958ع ۾ وفات ڪيائين. پنهنجي اباڻي قبرستان ۾ اڳئين وچ واري مقبري ۾ دفن ڪيو ويو. (ياد رهي ته ٽي مقبرا اڳين صف ۾ آهن)
سيد وريل شاھ کي چار فرزند ٿيا.
(1) سيد صادق علي شاھ
(2) سيد ارشاد علي شاھ سبزواري جنم ڊسمبر 1947ع وفات 28 آڪٽوبر 2015ع
(3) سيد فتح محمد شاھ عرف سيد حاجن شاھ سبزواري جنم 1944ع وفات آڪٽوبر 2015ع.
(4) سيد مظفر علي شاھ
سيد صادق علي شاھ سبز واري
سيد صادق شاھ سبز واري، هڪ قابل ۽ ڪامياب وڪيل ۽ شهر سيوهڻ جو سڀ کان اعليٰ تعليم يافته شخص هو. پاڻ ڪجه وقت سيوهڻ ٽائون ڪاميٽي جو چيئرمين پڻ رهيو. بلند خيال، خدمت ۽ ڪرڻ جي اعليٰ ظرف کيس سيوهڻ جي ماڻهن ۾ دلعزيز بنايو (3). سندس ٻه پٽ هئا. سيد علي رضا شاھ1960ع ۾ ڄائو، 1980ع ۾ ننڍي عمر ۾ وفات ڪري ويو ۽ ٻيو نمبر پٽ ڊاڪٽر مهدي رضا شاھ حال حيات آهي. سيد صادق علي شاھ 2000ع ڌاري وفات ڪري چڪو آهي. اباڻي قبرستان ۾ اڳئين اولهه واري مقبري ۾ مدفون ڪيو ويو. اندر مقبري ۾ ٻيون مزارون به آهن، پر انهن جي خبر نه پئجي سگهي آهي. صادق علي شاھ جا ٻه ڀائر سيد ارشاد علي شاھ ۽ سيد فتح محمد شاھ عرف سيد حاجن شاھ به دنيا ڇڏي چڪا آهن. باقي سيد مظفر علي شاھ حال حيات آهي.
حوالا ۽ مددي ڪتاب
(1) سيوهاڻي خير محمد ٻرڙو سيوهڻ صدين کان مراد پبليڪيشن سيوهڻ 2009 صفحو 387
(2) سيوستان کان سيوهڻ تائين قاضي آفتاب رضا مغل ادره شهباز 2015 صفحو 30
(3) سيوهاڻي خير محمد ٻرڙو حوالو اڳ آيل آهي. ص 428