سيد خان شاھه شيرازي
سيد خان شاھ شيرازي ولد سيد عالم شاھ شيرازي ولد سيد محمد بچل شاھ شيرازي تعلقه سيوهڻ جي ڳوٺ ڪرمپور ۾ 1951ع ڌاري پيدا ٿيا. سندس تعليم ميٽرڪ هئي، سيد خان شاھ کي سيد خان شاھ لاهوتي به سڏيو ويندو هئو، سندس اُهو نالو مشهور به هئو ۽ هن وقت به مشهور آهي.
”پاڻ سيوهڻ ۾ اچي پنهنجي هڪ الڳ بيٺڪ ٺاهي، فقيري رنگ ۾ اچي ويهي رهيو، کيس قلندر سائين جي فيض مان عاجزي ۽ انڪساري جو ونڊ مليو، کيس قلندر سائين جي درگاھ سان گهڻو پيار هو. پاڻ سيوهڻ جي هر امير توڙي فقير، ساداتن سميت عام ماڻهن سان نياز مندي ۽ عاجزي سان پيش ايندو هو(1). سندن چوڻ هو ته قلندر جي شهر جي هر ماڻهو توڙي جانور جو احترام ڪرڻ گهرجي، سيد خان شاھ شيرازي وارا ڇھه ڀائر هئا.
سيد احمد علي شاھ
سيد بچل شاھ
سيد علي بخش شاھ
علي اصغر شاھ اصغر شيرازي
سيد خان شاھ شيرازي
سيد خان شاھ شيرزاي جو والد صاحب سيد عالم شاھ شيرازي 1904ع ۾ ڳوٺ ڪرمپور تعلقه سيوهڻ شريف ۾ پيدا ٿيا. پاڻ پنهنجي وقت جا تمام وڏا نيڪ بزرگ هئا. تعليم جي حصول لاءِ شروع ۾ ڪاٺيا ڪيريا موجوده نوان ڀلائي تعلقا سيوهڻ ۾ پڙهڻ ويٺا. جتان پوءِ ڳوٺ ڪٻرن لڳ قاضي احمد ضلعي نوابشاھ ۾ علامه مولوي عبدالله يمشي ڪٻر وٽ علم حاصل ڪري فارغ التحصيل ٿيا. (2)
سيد عالم شاھ شيرازي سعودي عرب به ويا هئا جتان حج جي سعادت ماڻي واپس آيا. ”پاڻ بذات خود ڪنهن کي به مريد نه ڪيائون، ليڪن سندن خاندان جي وڏڙن جا جيڪي مريد هئا. تن کي بخوبي ٻچن وانگر سنڀاليندا هئا. قد بت ۾ پورا پنا، نه ٿلها نه سنها، اکيون وڏيون ڀرون جاڙا سفيد هئا، سندن منهن مبارڪ ۾ هشمت ۽ نور پيو نظر ايندو هو. لباس ۾ اڇو پهراڻ ۽ اڇي شلوار اوڍيندا هئا. اڇي ململ جي پڳ ۽ اڇي چادر زيب تن ڪندا هئا. پيرن ۾ موچڪي جتي پائيندا هئا، هلڻ جا مور ۽ قدم کڻڻ ۾ محبوب لڳندا هئا. (3) 5 رمضان المبارڪ 1395ھ مطابق 1975-8-12 تي هيءَ دنيا ڇڏيائون.
سيد خان شاھ شيرازي الله لوڪ انسان هئو، چرس تمام گهڻو واپرائيندو هئو. هن مقالي لکندڙ هن فقير شخص کي روبرو ڏٺو هو. طبيعت جو سادو جڏهن ته خان شاھ جو والد صاحب اهل سنت جي فرقي سان تعلق رکندو هو، ته سائين خان شاھ شيرازي ۾ اهل تشيع جي فرقي سان محبت رکندو هو. آءٌ جڏهن احوال لکڻ لاءِ خان شاھ شيرزاي جي درگاھ تي ويس ته مٿان مقبرو خوبصورت ٺهيل هئو. ڪيئي زيارتي اچن وڃن پيا. ٻاهرين ديوار تي هي شعر اردو ۾ لکيل هئو،
سائين خان شاھ دولها
تيرا جنت ۾ جهولا
جو تجهه ڪو بهولا
وه در در رولا
سيد خان شاھ شيرازي شادي ڪانه ڪئي هئي. ان ڪري کيس دولها گهوٽ چيو وڃي ٿو. سيد خان شاھ جو مقبرو چوٿنبي ڏي ويندڙ رستي تي ريل ۽ روڊ جي وچ ۾ موجود آهي. سيد خان شاھ جو وصال ناگياني واقعي سبب ٿيو. خان شاھ پنهنجي رهائش تي ستل هئو، ڪکائون ڇپرو ٺهيل هو رات جو ڇپر کي اوچتو باھ لڳي وئي. سائين خان شاھ به ان ۾ سڙي شهيد ٿي ويو. 29 شوال 1418ھ 27 فيبروري 1998ع تي وفات ڪيائين.
حوالا
(1) دم مست قلندر مئگزين 2010ع اگسٽ صفحو 14
(2) سيوهاڻي خير محمد ٻرڙو، سيوهڻ صدين کان، مراد پبليڪيشن سيوهڻ 2009ع صفحو 406
(3) سيوهاڻي خير محمد ٻرڙو حوالو اڳ آيل آهي. صفحو 407