فقير رسول بخش ملاح ”ٻيڙي وارو“
فقير رسول بخش ملاح ولد محمد بچل ملاح ولد محمد اسحاق ملاح سيوهڻ شريف جي بندر محلا ۾ ڄائو، صرف قرآن شريف مدرسي ۾ پڙهيو هو. ٻي ڪا تعليم حاصل نه ڪيائين. پاڻ چار ڀائر هئا. پهريون وريام فقير، ٻيو صالح فقير، ٽيون فقير رسول بخش ملاح (ٻيڙي وارو“ چوٿون پيرل ملاح، پاڻ اڪثر ڪري درياءَ تي ٻيڙيءَ ۾ ويهي عبادت ۾ مشغول هوندا هيا. ان ڪري هن فقير تي نالو ”فقيررسول بخش ملاح ٻيڙي وارو“ پيو جيڪو مشهور ٿي ويو. سندس مرشد محمد يوسف شاھ (مسوڀرڳڙي) لڳ حيدرآباد جن هيو.
سندس وٽ اڳوڻو وزير اعليٰ سنڌ سيد عبدالله شاھ بابا احمد علي قريشي ۽ ٻيا ڪيئي دعا وٺڻ ايندا هيا. سندس وٽ هڪ دفعو محترمه شهيد بينظير ڀٽو به آئي هئي. آخري ڏهاڙن ۾ جڏهن فقير رسول بخش ملاح بيمار هيو ۽ ڪراچي جي هڪ نجي اسپتال ۾ داخل هيو ته اڳوڻي وزير اعليٰ سيد عبدالله شاھ سندس علاج ڪرايو هو. سندس مقبرو سندس پوٽي فقير علي گل ملاح ٺهرايو آهي. علي گل ملاح جو چوڻ آهي ته هي جيڪو مقبرو مون ٺهرايو آهي ان ۾ جديد دور هوندي به لوھ جو استعمال نه ڪيو ويو آهي. مقبري جي ديوارن ۽ اڏاوت ۾ چن، کيرولي، ڏاچي جو کير، سيمينٽ، اڇي واري درياءَ جي وادي ۽ سرون استعمال ڪيون ويون آهن. ڪاريگر غلام قادر ملاح دادو واري گنبذ بيهاريو آهي ۽ بنيادي ڪم استاد علي نواز ملاح ڪيو آهي.
فقير رسول بخش ملاح ٻيڙيءَ واري جي وفات 17 ربيع الثاني 1416ھ بمطابق 14 سيپٽمبر 1995ع تي ٿي سيد عبدالله شاھ جي چوڻ موجب کيس لعل باغ سيوهڻ جهانگارا ويندڙ روڊ ڇنڊڻ جي ڪناري مدفون ڪيو ويو، جتي سندس مٿان عاليشان مقبرو ٺهيل آهي. مقبرو بابا احمد علي قريشي جي مقبري سان گڏو گڏ آهي1. (هي مقالو لکندڙ)
هن فقير کي روبرو ڏٺو هيو، مٿي کي رومال ٻڌندو هيو، چاپاهي ڏاڙهي هوندي هيس، ڏاڙهي کي ميندي هڻندو هيو، نيڪ انسان صوفي منش درويش هيو، ڪڏهن به ڪنهن کي نه ڏکايائين نه ڪنهن کي برو ڀلو چيائين.
حوالا
(1) خير محمد ٻرڙو سيوهاڻي سيوهڻ صدين کان مراد پبليڪيشن سيوهڻ شريف 2009ع ص 429
(2) عبدالرحيم لغاري سهيڙيندڙ حضرت بابا سائين احمد علي قريشي قلندري ميرل اڪيڊمي حيدرآباد 2016ع ص 76
(3) رسالو حسن درس جو انڊس فائونڊيشن حيدرآباد 2001ع ص 37
(4) عبدالرحيم لغاري سهيڙيندڙ حضرت بابا سائين احمد علي قريشي قلندر ميرل اڪيڊمي حيدرآباد 2016ع ص 176- 175