سيد عزت علي شاھه سبزواري
سيد عزت علي شاھ ولد سيد حاجي موٽيل شاھ سبزواري جي گهر ۾ 16-11-1939 تي سيوهڻ شريف ۾ جنم ورتو. پرائمري تعليم سيوهڻ شريف مان حاصل ڪئي. وڌيڪ تعليم حاصل ڪرڻ لاءِ هالا ويو، سروري ڪاليج هالا مان انٽر جي ڊگري حاصل ڪيائين. مخدوم امين فهيم هالا وارو، ناليوارو شاعر ۽ سياستدان سندن ڪلاس ميٽ هيو. پاڻ سوشل اسٽوڊنٽ فيڊريشن جو صدر پڻ رهيو.
سيد عزت علي شاھ پنهنجي والد صاحب جي نقش قدم تي هلندي هر مهيني جي ايڪيهينءَ جي خيرات کي جاري رکيو. غريبن ۽ بيواهن جي مدد ڪندا هئا، ۽ انهن جا همدرد پڻ هئا. درگاھ تي روزانو حاضري پنهنجي والد وانگر ڀريندا هئا ۽ خدمت ڪندا هئا. (3)
سنڌ جو اڳوڻو وزير اعليٰ سيد عبدالله شاھ سندن ويجهو دوست هيو. اڳتي هلي سندن دوستي عزازت ۾ تبديل ٿي وئي. شاھ صاحب پنهنجي سياست پيپلزپارٽي کان ئي شروع ڪئي. هو سيوهڻ ۾ پيپلزپارٽي جو اهم اڳواڻ هيو. وزير اعليٰ سنڌ سيد عبدالله شاھ اڪثر وٽن ايندو هو. هن ڪافي بيروزگارن کي نوڪريون مفت ۾ وٺي ڏنيون، ڪيترائي گهر خوشحال ڪيا. هو غريبن کي پڙهائڻ لاءِ به همٿائيندو هيو. خير خيراتون ڪندو هيو 1988ع تي پيپلز پارٽي کيس ايم پي اي جي ٽڪيٽ ڏيڻ جي آڇ ڪئي، پر سيد صاحب قبول نه ڪئي. سيد عزت علي شاھ يارن جو يار خوش اخلاق ۽ سخي انسان هيو. سياسي، سماجي ۽ مذهبي حوالي سان گهڻي ڄاڻ رکندڙ شخص هو.
سيد عزت علي شاھ صاحب ٽائيم جو وڏو پابند هيو، صبح جو اٿي نماز پڙهي ان کان پوءِ قرآن شريف جي تلاوت ڪري قلندر لعل شهباز جي درگاھ تي ويندو هيو، پاڻ درگاھ تي ٻهاري به ڏيندو هيو. اتان موٽي ننگر ورهائيندو هيو. شاھ صاحب جي خاندان وٽ ٽي وقت ننگر جي رسم اڄ به جاري آهي. هن ننگر جو سلسلو اڄ به هلندو رهي ٿو، سون جي تعداد ۾ مسافر، زيارتي، عقيدتمند ۽ شهر جا غريب کائيندا آهن ۽ سنڌي مهيني جي 21 تاريخ تي وڏو ننگر ٿيندو آهي. هن سخي انسان 2000-11-15 تي فاني دنيا کي ڇڏي راھ رباني ورتي، سندس اباڻي قبرستان مير ڪلان جي مقبري ويجهو مدفون ڪيو ويو.
مير ڪلان جو قبرستان 100 کن ايڪڙن تي مشتمل هيو، پر هاڻي ان جو گهڻو حصو ماڻهن قبضا ڪري گهر ٺاهي ڇڏيا آهن، هن وقت هي ٽن حصن ۾ ورهايل نظر اچي ٿو. هڪ حصو معصومن جو مقام ، ٻيو ميرڪلان سبزواري جو قبرستان ٽيون موجوده سبزواري سيدن جو قبرستان هن قبرستان ۾ هزارن جي تعداد ۾ مزارون موجود آهن، جن ۾ مختلف ذاتين وارا به مدفون آهن.