شيخ عبدالرزاق جيلاني ”سخي پاڻ سلطان“
حضرت سخي پاڻ سلطان جو اصل نالو حضرت شيخ عبدالرزاق جيلاني هو. پاڻ حضرت شيخ عبدالقادر جيلاني ”ثاني“ جا فرزند آهن. شيخ عبدالقادر جيلاني ثاني، جي والد جو نالو حضرت شيخ حسن جيلاني المعروف شيخ محمد حسيني هو، جيڪي پيرن پير حضرت سيد عبدالقادر جيلانيرح جا فرزند هيا، حضرت شيخ عبدالرزاق جيلاني سخي پاڻ سلطان ڏهين صدي هجري جي شروعاتي دور ۾ سيوهڻ ۾ آيا1.
سيوهڻ ۾ هن وقت سخي پاڻ سلطان جي نالي سان پورو محلو آهي. سخي پاڻ سلطانرح جي ڪري، هن محلي تي اُهو نالو پئجي ويو آهي. جڏهن ته سندس اصل نالي کان گهٽ ماڻهو واقف آهن. جڏهن سخي پاڻ سلطان نالو مشهور آهي. سخي پاڻ سلطان جو 7-8-9 ذوالحج تي ميلو لڳايو ويندو آهي.
سخي پاڻ سلطان پاڻ پنهنجي وقت جا وڏا عالم دين هيا، ۽ صاحب ڪرامت هئا. اڪثر سخاوت تمام گهڻي ڪندا هئا. سخاوت جي شاهانه انداز ڪري کين سخي پاڻ سلطان سڏيو وڃي ٿو. سندن آستاني تي هيمشه سرد و سماع جون محفلون ٿينديون هيون، سندن محفلن ۾ فقراءَ توڙِي وقت جا امراءِ شريڪ ٿيندا هئا2.
سخي پاڻ سلطان جو مقبرو سيوهڻ جي تاريخي قلعي جي ڏکڻ ۾ شهر ۾ موجود آهي. سندن مقبري ۾ اڪيلي مزار آهي، مقبرو ويجهڙائي دور جو ٺهيل آهي. سخي پاڻ سلطان جي مقبري ڀرسان هڪ ٻيو مقبرو به آهي، جنهن لاءِ ٻڌايو وڃي ٿو ته، هي فقير سخي پاڻ سلطان جو مريد هيو، اصل وڏا ان جا انڊيا جا هئا. پاڪستان ٺهڻ کان پوءِ ڪراچي لڏي آيا. سيد مشتاق احمد چشتي3، وصيت ڪئي هئي، جي منهنجو موت ٿي پئي ته مونکي سيوهڻ ۾ دفنايو وڃي. سيد مشتاق احمد جو روڊ ايڪسيڊنٽ ٿي پيو زخمن جا سور نه سهندي وصال پاتائين،سندس ڪراچي جي هڪ قبرستان ۾ مدفون ڪيو ويو، سيوهڻ ۾ تبرڪ طور سيد مشتاق احمد جا ڪپڙا ۽ هڪ آڱر مدفون ڪري مزار ٺاهي وئي آهي، ان مٿان مقبرو به ٺهيل آهي. سندس مزار مبارڪ تي هي ڪتبو لکيل آهي.
سيد مشتاق احمد چشتي
ولد سيد حافظ احمد حسين چشتي
وفات 27 رمضان 1391ھ
7 نومبر 1971.
سخي پاڻ سلطان جي مقبري جي احاطي ۾ ڪيتريون ئي ٻيون مزارون به آهن.