معصوم شيخ محمود ۽ شيخ احمد (پير پوٽا)
هن درگاھ جي چوڌاري قبرستان آهي، سنڌ جي ناليواري بزرگ سبزواري سيدن جي وڏي سيد ميرڪلان جي مقبري جي اولهه ۾ هي مقبرو موجود آهي.
شيخ محمود ۽ شيخ احمد جون ننڍيون مزارون آهن، جئين ٻارن جو عام مزارون ننڍيون هونديون آهن. ان ڪري هنن کي ”معصوم“ سڏيو وڃي ٿو. معصوم جي نالي سان سيوهڻ ۾ محلو آهي، ڀرپاسي جا رهواسي ۽ پاڻ کي معصومن جا رهائشي سڏائيندا آهن.
”هنن معصومن لاءِ روايت ملي ٿي ته هي معصوم پنهنجي پيءَ سان گڏ تبليغ لاءِ هتي آيا هئا، پر ڪافرن هٿان شهيد ٿي ويا، هي قادري طريقي سان واسطو رکن ٿا جنهن جي ڪري قادري طريقي سان واسطو رکندڙ اڪثر ماڻهو هن درگاھ جا مريد آهن. هيءَ درگاھ مغليه اڏاوت جو شاهڪار آهي“1.
چيو وڃي ٿو ته هي ٻئي ڀائر آهن، سيد عبدالقادر جيلاني بغدادي جي خاندان جا چيا وڃن ٿا. معلوم نه ٿي سگهيو آهي ته هي ڪهڙي دور ۾ سيوهڻ آيا؟ والد صاحب جو نالو ڇا هو؟ ننڍڙا معصوم هئا؟ ڪنهن ڪتاب يا ڪنهن وٽان معلومات نه ملي سگهي آهي، شيخ محمود ۽ شيخ احمد جي احاطي ۾ ڪيتريون ئي ٻيون مزارون به آهن.