چاهه سان چاهه جي رهندو ته چاهتون مِلنديون
روح سان روح جي رلبو ته راحتون مِلنديون
مون ته پوڄا پئي ڪئي سونهن جي سوچيو به نه هو،
موٽ ۾ پيار جون ايڏيون مَراعتون مِلنديون
مان ته سائل آهيان تُنهنجو ۽ رهڻ ٿو چاهيان،
تون مُحبت جو سخي آن سَخاوتون مِلنديون
جاءِ جيءَ ۾ جي ڏيو ٿا ته اسان کان به پرين،
عمر ڀر لاءِ اوهان کي صَداقتون مِلنديون
ڪوئي جابر ڪوئي جلاد نه بَچندو باقي،
برهه جا باز ٿا جاڳن بغاوتون مِلنديون
عشق پنهنجي ۾ ايڏي سگهه ٿو سَمجهان زاهدَ،
حُسن کان قرب جون بيحد عنايتون مِلنديون