ٿوهر رهياسين ٿر جا ڪونپل نه ٿي سگهياسين
پٿر مزاج پنهنجا، ڪومل نه ٿي سگهياسين
گذري ويون گهڙيون سڀ گمنام وهڪرن ۾
جو پل املهه امر هو سو پل نه ٿي سگهياسين
بي جوڙ ساٿ ۾ ڄڻ لڙهندا رهياسين تنها
هڪڙي به مسئلي جو ڪو حل نه ٿي سگهياسين
ڪوريو سدا جدائي آ ماس پئي هڏن جو
افسوس ڪات آڏو ڪا جهل نه ٿي سگهياسين
محدود زندگيءَ کي محظوظ ڪيئن ڪجي ها
سادا سچا رهياسين ڪا ٽل نه ٿي سگهياسين
حالات جي هٿن ۾ مجبور ٿي مئاسين
بابي امان جي لاءِ ڪو ٻل نه ٿي سگهياسين