سرمئي شامون ٽهڪ ۽ روح رهاڻيون ياد ڪر
باک ويلي پيار پوکيون جي ڪهاڻيون ياد ڪر
تو نديءَ ۾ پير ٻوڙي ڪيئن ڪيون ٿئي کيچلون
پئي شفق ۾ اڀ مٿان ڪونجون اڏاڻيون ياد ڪر
ڳوٺ جي اسڪول جا استاد ۽ صورتخطيون
ڀوڳ ۾ هڻنديءَ هُئينءَ ڳاڙهيون منڌاڻيون ياد ڪر
شام جو پپرين جي پويان ٻير ڀرسان پوک ۾
ڳوٺ جي سرتين سان تاڙيون ۽ کانڀاڻيون ياد ڪر
موڪلن ۾ شهر کان آيو هيس جيئن ڳوٺ ڏي
تو پَڪل ڪيئن مُڱَ ڦريون مون ڏي اماڻيون ياد ڪر
ڪنهن ڊگهي ديوار پويان قيد اڄ ڪاٽين پئي
ويڪرا گهر جا اڱڻ ڳالهيون پراڻيون ياد ڪر