جبل جهاڳي سسئي جئن ڪشالا ڪبا
توکي ساري سڄڻ نيڻ آلا ڪبا
مون مڃيو عشق کائي رڳو ماس ٿو
ماس عضون سندا سڀ نوالا ڪبا
تنهنجي حسناڪين سان سراڻي سڀئي
پنهنجا جذبا پرين سورنهن سالا ڪبا
چپ چورڻ جي زحمت رڳو ڪر پرين
تنهنجا الفاظ سارا مقالا ڪبا
هر هلاڪو ۽ چنگيز سان جهيڙبو
ديد بندوق ۽ هٿ ڀالا ڪبا
پنڌ آهي پري دير آ خير آ
پير پنهنجا پٿون پير ڇالا ڪبا
لاٽ ٻاري ڀٽائي جي بيتن سندي
سنڌ تنهنجي گهٽين ۾ اُجالا ڪبا