سيد مظهر سيوهاڻي (ولادت 1918ع وفات 1985ع)
ٽيڙو ڪَتي ويا نجهري، پر هو پرين نه آيو،
ڏسندي ٿي، رات گذري، پر هو پرين نه آيو.
همدرد چنڊ بڻيو، تارن کي رحم آيو،
پرڀات آئي اڀري، پر هو پرين نه آيو.
آيو بهار موٽي، آيا چمن ۾ ٻيهر،
گونٽو گلاب نسري، پر هو پرين نه آيو.
اميد آسري تي واعدي وچن سندس تي،
ويا ڏينهن راتيون گذري پر هو پرين نه آيو.
جوڳي فقير ڀيٽيم، پيرن تي باسون باسيم،
ڪيم رسم ريت پوري، پر هو پرين نه آيو.
تنهائي بيقراري حاوي هُئي انتظاري،
“مظهر” اچي وئي پيري، پر هو پرين نه آيو.