پبلشر نوٽ
لاڙڪاڻي سان تعلق رکندڙ هڪڙي علمي ادبي شخصيت، جنهن کي ادب جي دنيا ۾ ڊاڪٽر غلام رسول جي نانءُ سان سڃاتو وڃي ٿو. ڊاڪٽر غلام رسول سومري زندگيءَ جو اڌ کان وڌيڪ حصو علم ۽ ادب کي ڏنو آهي، هن نه رڳو سنڌ، سنڌي ٻولي توڙي ادب سان بيحد پيار ڪيو آهي، پر هن ٻوليءَ جي بقا لاءِ جاکوڙ پڻ ڪئي آهي. هو سنڌ جي تهذيب جو وارث ته آهي ئي پر سندس شخصيت ۾ اصلوڪي سنڌ نمايان نظر اچي ٿي، ڊاڪٽر صاحب توڙي جو هن وقت ڪراچيءَ ۾ رهائش پذير آهي، پر دنيا جي ترقي يافته ملڪن جو شعور رکي ٿو، ان جي باوجود سندس مزاج موهن جي دڙي جي ماڻهن جهڙو آهي. سندس شخصيت نفيس جذبن جي مالڪ آهي، هو اندر توڙي ٻاهر اڇو اجرو آهي. هو جهڙو ڳالهائي ٿو تهڙو لکي ٿو.
ڊاڪٽر صاحب جو هڪڙو ڪتاب ”سنڌوءَ ڪناري ساروڻيون“ ڪجهه ئي وقت اڳ مرڪ پبليڪيشن طرفان شايع ٿيو هو، خوشيءَ جي ڳالهه اها به آهي ته سندس ٻيو ڪتاب ”ڳالهيون ڪيناڊا جي وڻ وڻڪار جون“ پڻ ساڳي اداري طرفان شايع ٿي اوهان جي هٿن تائين پهتو آهي. هي ڪتاب ڊاڪٽر صاحب جي ڪيناڊا جي سفر جو نتيجو آهي. هي سفرنامو روايتي سفرنامن کان مختلف آهي، ڇو ته ڊاڪٽر صاحب ڪيناڊا ۾ گهڻو وقت رهي اُتان جي تهذيب، ثقافت، ماڻهن جي روين، ماڻهن جي رهڻي ڪهڻي، ۽ ادارن جي ڪارڪردگيءَ جو اڀياس ڪيو آهي. اُهو ئي سبب آهي جو سندس هن سفر نامي ۾ جلد بازي نظر نه ٿي اچي، هن جنهن به موضوع تي لکيو آهي، اُن کي اڳ ۾ سمجهڻ جي ڪوشش ڪئي آهي. هن هر ڳالهه اندازي موجب پيش نه ڪئي آهي پر هر موضوع جي تهه تائين پهچي قلم کنيو آهي. اُهو ئي سبب آهي جو سندس هن سفر نامي ۾ سنجيدگي ۽ گهرائي نظر اچي ٿي. اميد ته هي ڪتاب سنڌي ادب جي پڙهندڙن لاءِ، خاص ڪري نوجوانن لاءِ لاڀائتو ثابت ٿيندو.