خدا ٻي رت به ٺاهي آ
ڪيئه ساڙي اجاڙيا تو آشيانا عندليبن جا
مگر تنهنجا چَنڊي چٽڪا رڳو هن چئن ڏينهن جا
اجهو موٽي وري آيا اهي ئي ماهه مينهن جا
اچڻ سان اي خزان پنهنجا پکا هِت هُت اڏيئه پئي،
چمن مان نينهن وارن متوالن کي تڙايئه پئي
نه پئي سمجهيئه اري نادان دنياوي دور ڪوڙو آ
اها هستي حرفتائي وڏائي زور ڪوڙو آ
جڳائي ڪين بي نيازي جفا ۽ جور ڪوڙو آ
ڪرڻ بانَورُ زماني تي غرور و غور ڪوڙو آ
خبر ڏي اي خزان تنهنجو اڳواڻو ناز ويو ڪاڏي
ڪيئه پئي مفت مغروري اهو انداز ويو ڪاڏي
ڪمالي لازوالي هت نه ڪنهن جي بادشاهي آ
” ممتاز“ توکي مٽائڻ لئه خدا ٻي رت به ٺاهي آ
***