مرحوم حاجي عبدالمالڪ سانگي صاحب
محترم سانگي جو ننڍڙوآخري فرزند رئيس عبدالمالڪ جنهن جي پيدا ٿيڻ لاءِ بيت الله شريف ۾ دعا گهري هيائين الله تعاليٰ اهو پيدا ڪيو ۽ جڏهن اهو پنجن سالن جو ٿيو ته بيمار ٿي پيو ۽ ڪجھ وقت کانپوءِ الله تعاليٰ کي پيارو ٿيو. سندس وفات جي صدمي ۽ ڏک سبب هيءُ شعر چيائين
خشڪ مخمل ٿي ويئي ۽ بند ٿيو چنگ و رباب
رئيس جي رحلت سبب ٿيا جگر و جيرا ڀي ڪباب
بند ميخانو ويو ٿي پيا ڀڃي جام و صراحي
هرطرف آهي خزان ۽ ٿي سندم شام شباب
ڪو علاج غم دل نه آهي ڇڏ پچر منهنجي طبيب
دل جو دلبر ويو جدا ٿي زندگي مثل حباب
دل جا ارمان دل ۾ رهيا چئو عزيزو!ڇا ڪيان؟
دل ۾ آهي روڄ راڙو ۽ اکين ۾ آهه آب
يا الٰہ العالمين رحم ڪر ڪو راحمين
ڏي قرار دل سندم کي رئيس کي ڪلمه ثواب
خير رهند جو، گهري سانگي سندءِ بارگاهه مان
شل رکين قائم سندس تون خاندان جو جاه و تاب