اکين ۾ سمنڊ ٻوڙي سمنڊ ۾ ٻوڙي اکيون پنهنجون
ڇڏيون سي پاڻ پنهنجو پاڻ ۾ جوڙي اکيون پنهنجون
ازل کان اڻ ڏٺل چهرن ٻَڌي ڇڏيو اکين کي هو
وڏي مشڪل سان نڪتا آهِيون ڇوڙي اکيون پنهنجون
نه هڪ ڀي خواب هو پنهنجو نه ئي پنهنجو نظارو هو
نظر توڙي هئي پنهنجي هيون توڙي اکيون پنهنجون
اسان جسمن جيان پنهنجا ڇڏياسين خواب سڀ ڳاري
اسان ڪپڙن جيان قبلا ڇڏيون چوڙي اکيون پنهنجون
الائي ڪيترا منظر رهيل ها ڪيترا چهرا
عمر جي اڌ ۾ ئي ٿڪجي پيون ڊوڙي اکيون پنهنجون