بي مطلب ڳالهين تي ڳالهايون ويٺا
۽ مطلب هڪٻئي کي سمجهايون ويٺا
هڪٻئي جي حالت کان ٻئي ٻاهر ويهي
هڪٻئي جي اندر ليئا پايون ويٺا
ڪو ايندو ۽ هٿ وٺي پهچائيندو
ڪو به نه ايندو ليڪن واجھايون ويٺا
شروع کان هڪ سلجھيل مسئلي کي هوءَ ۽ مان
پوري دانائي سان سلجھايون ويٺا
هِن کي هُنَ کي هوءَ مڃيندي آ اڪثر
هِنَ کان هُنَ کان هن کي چَوِرايون ويٺا
پنهنجي ڳالهه نٿي پهچي تو تائين سو
تنهنجون ڳالهيون توکي پهچايون ويٺا