ڇا ٿي سوچين ڏسي مان ڀڳو ٿو وڃان
مختصر زندگي مان ڀڳو ٿو وڃان
ڪو به هوشيار مون جهڙو جڳ ۾ نه هو
او منهنجي سادگي مان ڀڳو ٿو وڃان
تنهنجي هر باب کان حُسن جي تاب کان
قهر جي ڇوڪري مان ڀڳو ٿو وڃان
منهنجي واعدي خلافي تي تون جيڪڏهن
رنج ٿئين ٿي، ته ٿي مان ڀڳو ٿو وڃان
تنهنجي ميدان مان ها سَرِ عام مان
او محبت مٺي مان ڀَڳو ٿو وڃان
دشمني ڇا دماغي ڪا خشڪي هئي
ڇا هئي دوستي مان ڀڳو ٿو وڃان
تنهنجي در تي هزارن جو پهرو ڏسي
تنهنجو چهرو ڏسي مان ڀڳو ٿو وڃان
اک ۾ ڪَکُ آ، ڪُکِ ۾ ڪانُ آ
ڪنڌ ۾ آ ڪِلي مان ڀڳو ٿو وڃان