ڪنهن کي آهه خبر ۽ ڪير ٻڌائيندو
ڪهڙو حال اسان جو ڪهڙو آئيندو
ذهني حالت ٺيڪ نه آ دانشور جي
قلبي حالت تي ليڪن ڳالهائيندو
مان هن کي سمجھائيندس هي ٺيڪ نه آ
سڀ ڪجهه ٺيڪ آ هُو مون کي سمجھائيندو
ڪيڏو ظلم ڪيو آ ”پنهنجو پاڻ“ مٿان
”پنهنجو پاڻ“ اميد ته مون کي بخشيندو
ٿر جهڙو هي روح اڃايل آ جيڪو
هر موسم ۾ بادل جا ڳڻ ڳائيندو
هو جو ڪافي دير کان مون وٽ ويٺو آ
پوءِ به لڳي ٿو ٿوري دير ۾ ڄڻ ايندو
هڪڙي ڏينهن ۾ جيڪو لک ڪمائي ٿو
سوچڻ جهڙي ڳالهه آ ٻئي کي ڇا ڏيندو
منهنجي اندر جو آرام پسند ماڻهو
نٿو لڳي ڪو پاسو ڀي بدلائيندو
جنهن سان ڀي منهنجي باري ۾ ذڪر ڪندينءَ
هٿ چُميندو تنهنجا توکي پوڄيندو
”اسرافيل“ جي صُور کان اڳ ئي دنيا کي
ڦوڪَ ڏئي انسان ”حسين“ اڏائيندو