پِتل جون ڇوڪريون سونا سندن چهرا
بدن جي وقت ۾ لمحا سندن چهرا
هي ڪهڙا شهر ۽ ڪهڙي سندن حالت
هي ڪهڙا ماڻهو ۽ ڪهڙا سندن چهرا
لڪائن ٿا قصا ڪيڏا اندر پنهنجي
ٻڌائن ٿا قصا ڪيڏا سندن چهرا
هوا ۾ ٿا اُڏامن باهه ۾ کامن
ٻرن ٿا ۽ اجھامن ٿا سندن چهرا
جوانيءَ جي پڇاڙيءَ ۾ رهيس جن سان
چوان ڇا پير تن جا ڇا سندن چهرا
هي منهنجي شهر ڪنڌرا جو نسل آهي
اڇا بت اصل کان اڇا سندن چهرا
وڻن جي ڇانوَ ۾ عمريون سندن پاڇا
عمر جي اُسَ ۾ پاڇا سندن چهرا
مون دنيا جا ڏٺا انسان سڀ بابا
ته جهڙو تنهنجو آ اهڙا سندن چهرا