الوداع زندگي جا سرمايا
منهنجي مايا حَسين ترمايا
بي عمل هن عمل جي دنيا ۾
منهنجا بي ساڀ خواب شرمايا
دانا بڻجي دُکي حياتيءَ ۾
ڪهڙا ڪهڙا نه بيوقوف آيا
ڏٻري، ڪمزور وقت جي گهوڙي
ڪيترا شهسوار ڪيرايا
نِجُ مردانگيءَ جا نُڪتا
هڪڙي عورت اسان کي سمجھايا
ساري دنيا جو رزق ڳڙڪائي
چار ماڻهو نه پوءِ ڀي ڍايا
منهنجي هڪ راءِ جي خلاف اٿيا
شهر جي ڪنڊ ڪڙڇ مان رايا
اصليت تو به پنهنجي ظاهر ڪئي
تو به چهري تي وار ڪيرايا
ڪنهن به پايي تي پير ڪونه رکيو
ڪيڏا پيرن جي هيٺ ها پايا