هِتي به ڇا ڪيو اٿم هُتي به ڇا وڃي ڪندس
هِتي به ٿو رُلان پيو هُتي وڃي به ڀٽڪندس
جڏهن ڪو رهنما ئي ناهه تون ئي چئه او زندگي
نه ڀٽڪندس ته ڇا ڪندس، ڪندس به نيٺ ڇا ڪندس
الائي ڪيترا ڏيئا اُجھڻ کان اڳ ٻري ويا
ڏيئي ڏيئي کي ڦوڪ ڏئي مان پڄرندس مان کامندس
چرين جي وچ ۾ مان ڏاهو ٿي رهان قبول پر
پو تنهنجو ڇا رَدِ عمل هوندو اگر نه ڪجهه ڪندس
ضرور منهنجي نالي ۾ اوهان جي ڳالهه ڳائبي
مان پنهنجي بيوفائي تي اکيون جھڪائي مُرڪندس
پري نه آ اُهو به ڏينهن، کَر تون ئي خريد جان
مان پنهنجي عاشقي سميت ٽڪي جي ملهه وڪامندس
هزار اختلاف توکي ڀل هجن ”حسين“ سان
سڳنڌ آهه عشق جي هُو مهڪندو مان جھومندس