شاعري

جيءَ ۾ ٽانڊا

ڪتاب ”جيءَ ۾ ٽانڊا“ اوهان اڳيان پيش ڪجي ٿو. هي ڪتاب ڀوپال هند جي نامياري شاعر ”کيمن يو. مولاڻي“ جي شاعريءَ جو پنجون مجموعو آهي، جنهن ۾ غزل، ٽيڙو، دوها ۽ وايون شامل آهن
Title Cover of book جيءَ ۾ ٽانڊا

هر گل پنهنجا رنگ ڪڍي ٿو

هر گل پنهنجا رنگ ڪڍي ٿو
خوشبوءِ ڏيندي ٽِڙي پوي ٿو

سورج هيڪر گهر مان نڪري
رلندو سارو ڏينهن رهي ٿو

وعظ ڪري ٿو زور زور سان
مال ته گهر ڏي کڻي وڃي ٿو

هوا پَنن کي وئي ڀَڄائي
ان کي ڪوبه نه ڏوهه ڏئي ٿو

ڦِٽو ڪيو جو سَنکُ سمنڊَ هو
نِتُ مندر ۾ رڙيون ڪري ٿو

من جي واديءَ ۾ سڏ هو گم
مگر پڙاڏو اڄ به اچي ٿو

ڇا ٿي پيو جي جهوني ڀت آ
چيِرُ نه چاپوڙو ڏسجي ٿو