اگر تون نه آھين !
نه مرڪڻ نه مستي،
نه ڪو دڳ الستي،
نه ويچار وستي،
اگر تون نه آھين !
نه سنسار پنهنجو،
نه غمخوار پنهنجو،
نه ڪمڪار پنهنجو،
بدن بار پنهنجو،
اگر تون نه آھين !
نه تارا سڃاڻان،
نه پيارا سڃاڻان،
نه چارا سڃاڻان،
اگر تون نه آھين!
نه انداز جيون،
نه همراز جيون،
نه اعزاز جيون،
نه آواز جيون،
اگر تون نه آھين!
نه نيڻن ۾ الڪا،
رهي سار، سڏڪا،
اندر منجھه اڊڪا،
نه خود جي آسڌ ڪا،
اگر تون نه آھين !
نه ساڃاھ من کي،
نه ڄاڻان مان بن کي،
تڪيان ڇا گگن کي؟
برھ باھ تن کي،
اگر تون نه آھين!
مرڻ ڇا جيئڻ ڇا؟
نه پرواھ ٿم ڪا،
هي ڏينهن جيها تيها،
نه ڪائي به آشا،
اگر تون نه آھين!
ته “شاهين” ڪهڙي؟
حياتيءَ ۾ ههڙي،
مٺا! ماٺ جهڙي،
ھا جهڙي نه تهڙي !
اگر تون نه آھين !