اڃان ته سنڌ ٿي جيئي
وفا نه ڪر جفا نه ڪر،
دوا نه ڪر دعا نه ڪر
مگر هينئون حصا نه ڪر،
اها گهڙي حيات آ!
اڃان ته ديپ ٻار تون،
اڃان نه لُڙڪ هار تون،
اڃان رڙي پڪار تون،
نه موت کي سنڀار تون
اڃان به ڏينهن رات آ،
اڃان ته عشق ٿو رڙي،
اڃان ته جيءُ ٿو ٿو سڙي،
اڃان ته سور ٿو لڙي!
ٻڌو ٻڌو ٻڌو اڙي،
اڃان تنوار تات آ،
اڃان ته سنڌ ٿي جيئي،
اڃان صدا ٿي دل ڏيئي
اڃان نه ماٺ ٿي ٿئي،
حيات مَڌُ ٿي پيئي،
لطيف واري لات آ،
اڃان وڙهي شاهين ٿي،
حيات حوصلو بڻي،
سمونڊ ٿيو ڪڻي ڪڻي،
اها ته وک وڻي وڻي
اڃان ڏري نه ڏات آ!