وسيلو، ڀرجهلو ۽ ڀَر ; عبدالڪريم ’ڪريم‘ پلي
ڪرم ۽ رحم جو ساگر، حبيب ِ ڪبريا آهي.
رواداري، صداقت ۽ شجاعت جو حقيقت ۾،
عظيم ۽ بي بيان منظر، حبيب ِ ڪبريا آهي.
ثنا ڪهڙي ڪبي سڀني رسولن کان، جڏهن موليٰ،
بنايو بااليقين برتر، حبيب ِ ڪبريا آهي.
ڏکوين، عاجزن ۽ بي سهارن جو هتي ۽ هُت،
وسيلو، ڀرجهلو ۽ ڀَر، حبيب ِ ڪبريا آهي.
عبث فڪر قيامت اي! چري دلڙي ڪرين ڇو ٿي،
جڏهن شافع سندو محشر، حبيب ِ ڪبريا آهي.
صبا چئجان وڃي نالي خدا، ساري ته زيارت لئي،
”ڪريم“ عاصي گهڻو مضطر، حبيب ِ ڪبريا آهي.