شفيع المذنبين جي سام آهيون ; سيد سردار علي شاهه ”ذاڪر“
گدائي ميڪده، ميخانه رُو سڀ.
خمار انگيز ساقي جون ادائون،
نچن ٿا روز پيمانا سبو سڀ.
حسينانِ جهان سڀ هيچ آهن،
شَھِ خوبان جي آڏو خوبرو سڀ.
هي ڪنهن جي آجيان عرش برين تي؟
فرشتا دست بسته، باوضو سڀ.
ڪئي معبود سان جا عبد، سا هئي،
گنهگارن جي حق ۾ گفتگو سڀ.
جمالِ اولين جي جان، احمدصه،
حقيقت سان حقيقت هوبهو سڀ.
اسيرِ زلف جانان ساري دنيا،
هُتي اهلِ سَما پابند مُو سڀ.
شفيع المذنبين جي سام آهيون،
انهي جي هٿ اسان جي آبرو سڀ.
ڏسان ذاڪر مدينو زندگي ۾،
پَسان رنگين نظارا روبرو سڀ.