عالمي بئنڪ جي هيڊ آفيس ۾
خاص طور تي ڊئمن ۽ ڊيلٽا جي ڪيس ۾ سنڌين هر حوالي سان زبردست موقف پيش ڪندي عظيم الشان قومي ٻڌيءَ جو مظاهرو ڪندي، پوري دنيا لاءِ هڪ مثال قائم ڪيو آهي. سياسي ميدان ۾ سنڌ جي هر سياسي ڪارڪن پاڻ ملهايو آهي.
فني ميدان ۾ سنڌ، اي اين جي عباسي، ادريس راجپوت، قاضي مجيد، ابرار قاضي، طاهر قريشي، عبدالمجيد نظاماڻي، اعجاز قريشي، هاشم لغاري، مشتاق ميراڻي، عزيز ناريجي ۽ نصير ميمڻ جهڙا حلالي پٽ پيدا ڪري دشمنن جا وات بند ڪري ڇڏيا آهن. ٻي پاسي قيصر بنگالي، صبيح الدين غوثي، زبيده مصطفيٰ، عارف حسن، شاهد حسن وغيره جهڙا وڪيل سنڌ جي ڪيس کي وڏي سپورٽ آهن.
ٻي پاسي سانا ۽ WSI جهڙين تنظيمن آمريڪا ۾ ويٺي پاڻيءَ جي منصفاڻي ورڇ، ماحوليات جي تباهي ۽ ڊرينج جي تباهڪار منصوبن لاءِ پاڪستان کي فنڊ ڏيندڙ عالمي بئنڪ (WB) جي هيڊ آفيس ۾ سنڌ جي ڪيس جي وڏي لابنگ ڪئي.
ايل بي او ڊي کي بين الاقوامي سطح تي ايترو ته کنيو ويو جو عالمي بئنڪ ۽ ايشيائي ترقياتي بئنڪ کي انسپيڪشن پينل جوڙي معائنو ڪرڻو پيو.
ان ڏس ۾ ايڪشن ايڊ پاڪستان، فشر فوڪ، ايس ڊي ايف جهڙين تنظيمن به وڏو ڪردار ادا ڪيو.
واشنگٽن جي دوري دوران ادي حميرا رحمٰن اسان کي عالمي بئنڪ جي هيڊ آفيس ۾ وقت وٺي ڏنو ۽ انهن ئي ڏينهن ۾ عالمي بئنڪ جو صدر وولف ووز ڪرپشن ثابت ٿيڻ تي بئنڪ کان ڌار ٿي چڪو هو، سو خود عالمي بئنڪ جي پنهنجي ساک،شفافيت ۽ گورننس جي ڍانچي تي وڏا تبصرا هئا.
اسان عالمي بئنڪ جي هيڊ آفيس جي بلند وبالا عمارت اندر ٻه ڪلاڪ کن سنڌ جي پاڻي، ڊرينج ۽ ڊئمن جي ڪيس تي ڳالهائيندا رهياسين. اسين شروع کان ئي چوندا آهيون ته انهن عالمي ادارن سان ڊائيلاگ ضرور ڪجي ته جيئن انهن وٽ سنڌ ۽ سنڌ جي مؤقف بابت پهتل غلط تاثر کي ختم ڪجي. ان ڏس ۾ آمريڪا جا دوست وقت به وقت انهن عالمي مالياتي ادارن سان لهه وچڙ ۾ رهندا آيا آهن. عالمي بئنڪ جي دوستن سان بهترين ميٽنگ ٿي.
مون کي ميٽنگ ڪجهه وقت اڳ ۾ ڇڏڻي پئي جو وائيس آف آمريڪا جي اردو سروس جو پاپولر اينڪرپرسن فيض الرحمٰن پنهنجي آفيس ۾ منهنجو انتظار ڪري رهيو هو. هوڏانهن ادي حميرا ۽ نصير ميمڻ عالمي بئنڪ جي اعليٰ عملدارن سان ڳالهه ٻولهه ۾ مصروف رهيا.