محرابپور جي قديم ڳوٺن ۾ ٿيندڙ عزاداري
ڳوٺ سيد خدابخش شاهه، (ديهه لانگڙجي) ۾ سيد غلام عباس شاهه نقوي ۽ سيد خادم حسين شاهه نقوي، پاران ٿيندڙ مجلس عزا ۽ عزاداريءَ جي پروگرامن جي فهرست هن ريت آهي.
8، 9 محرم الحرام، 12 صفر، 1،2،3، جمادالاول، 19، 20، 21، رمضان، 11، 12 شوال، 13، 14، 15 هين جمادالثاني، ان کان علاوه مستورات لاءِ امام بارگاهه (سيد مٺل شاهه) ۾ 11، 19 صفر، 12، 24، 25 محرم الحرام، 18 رمضان، 16 ذوالحج، 5 ربيع الاول، 25 رجب المرجب تي مجلس عزا، 9 شوال المڪرم تي شب بيداري ٿيندي آهي. امام بارگاهه سيد مٺل شاهه، جي مُتولي سيد محسن شاهه نقوي، پاران 2016ع کان امام بارگاهه جو نالو، امام بارگاهه ڪربلا (سيد مٺل شاهه) رکيو ويو آهي. هن امام بارگاهه جو باني سيد مٺل شاهه ۽ مُتولي سندس ئي خاندان مان آهي. هن امام بارگاهه مان سيد محسن شاهه نقوي، پاران 20 صفر تي شهر جي مرڪزي جلوس ۾ محمل پڻ ڪڍيا ويندا آهن. سيد محسن شاهه نقويءَ 2015ع ۾ نائين محرم تي روهڙيءَ ۾ نڪرندڙ ’ڪربلا‘ جهڙي هڪ زيارت ٺاهرائي جيڪا ڏهين محرم جي رات جلوس ۾ ڪڍندو آهي.
امام بارگاهه زينبيه (س)
امام بارگاهه ڪربلا (سيد مٺل شاهه _ ڳوٺ سيد خدابخش شاهه، ديهه لانگڙجي) هن امام بارگاهه جي ڀرسان تقريبن 20 سال پراڻي امام بارگاهه ۾ (زوجه) غلام اڪبر خاصخيليءَ پاران 2015ع کان ضريح اقدس سانئڻ زينب سلام الله عليها رکي وئي آهي؛ جنهن ڪري هن امام بارگاهه جو نالو ”امام بارگاهه زينبيه“ رکيو ويو آهي. 2014ع کان هتي پهرين محرم کان تيرهين محرم تائين مستورات جي مجلس ٿيندي آهي. 18 ۽ 20 صفر تي مجلس ٿيندي آهي. ان کان علاوه 21 رمضان جي مجلس ٿيندي آهي. ڏهين صفر تي هن امام بارگاهه کان امام بارگاهه ڪربلا (سيد مٺل شاهه) تائين معصوم ٻارڙن جو جلوس ٿيندو آهي. جيڪو معصوم سڪينه (ص) جي ڏکن ۽ دردن جي ياد تازه ڪندو آهي.
ڳوٺ گاهي راهوءَ ۾ عزاداري
هن ڳوٺ ۾ عزاداريءَ جو سلسلو 1995ع کان شروع ٿيو. جيڪو هن ڳوٺ جي معزز شخصيت استاد، اديب، شاعر ۽ فقيري مزاج رکندڙ استاد رسول بخش شيخ شروع ڪيو. جنهن سلسلي کي سندس اولاد ۽ برادري هن مهل تائين سهڻي نموني سان هلائيندا اچن ٿا.
هن ڳوٺ ۾ نائين محرم الحرام تي ’ٽنڊو ڪرم خان نظاماڻي‘ مان انجمن مداحِ اهلبيت پاران 1995ع کان هڪ وڏو ماتمي جلوس استاد رسول بخش شيخ جي اوطاق تي لڳل علم حضرت عباس عه وٽ اچي ڀرپور نموني عزاداري ڪرڻ بعد پير عثمان شاهه، سانوڻ راهو ۽ ٻين پڙن تي پنهنجي روٽ سان روانو ٿي ويندو آهي. هن جلوس جي ماتمدارن لاءِ نياز ۽ سبيل جو انتظام استاد رسول بخش شيخ جي اولاد کان علاوه سانوڻ راهو ۽ ٻين مومنن پاران ڪيو ويندو آهي.
هتي 28 صفر شهادت حضرت امام حسن المجتبى عليه السلام جي مناسبت سان 2014ع کان وڏي مجلس عزا ٿيندي آهي. جيڪا صبح جو 10 وڳي شروع ٿي شام جو 6 بجي ختم ٿيندي آهي؛ جنهن کي سنڌ جا نامور عالم ۽ ذاڪر خطاب ڪندا آهن. بعد مجلس عزاداري ٿيندي آهي جنهن ۾ مير فيض ٽالپر، فقير ملازم مڱڻهار جن نوحه خواني ڪندا آهن. هن عزاداريءَ جو سڄو اهتمام حامد علي شيخ، نويد علي شيخ، ڪاظم رضا شيخ، رياض حسين شيخ، قاسم علي شيخ ۽ اڪرم علي شيخ جن ڪندا آهن. 2015ع کان 17 ربيع الاول تي هڪ وڏو جشن رسول خدا ﷺ جي مناسبت سان منعقد ڪيو ويندو آهي. جنهن ۾ نياز، سبيل وغيره جو سڄو انتظام نظام الدين شيخ پاران ڪيو ويندو آهي.
ان کان علاوه هن ڳوٺ ۾ 2000ع کان ڏهين محرم الحرام، تيرهين محرم ۽ 20 صفر چهلم حضرت امام حسين عه جي سلسلي ۾ وڏي نياز جو اهتمام ڪيو ويندو آهي جيڪو سڄو ڏهاڙو هلندو آهي. ڏهين محرم ۽ چهلم جي نياز جو بندوبست نديم حسين شيخ ۽ تيرهين محرم جو نياز استاد رسول بخش شيخ (مرحوم) پاران ڪيو ويندو آهي. هن ڳوٺ ۾ شروع ٿيل پروگرام پنهنجي ترتيب سان هن مهل تائين ٿيندا اچن ٿا. هن ڳوٺ ۾ 2014ع کان مستورات جي عزاداريءَ جا پروگرام پڻ شروع ٿيا آهن. جيڪي پهرين محرم کان ڏهين محرم تائين مختلف گھرن ۾ ٿيندا آهن.