منهنجا محب مديني وارا : نعت رسول مقبولﷺ
منهنجا محب مديني وارا، تنهنجي نانوَ جا آهن نعرا.
سڄو فرش ثنا تنهنجيءَ ۾، تنهنجاعرش مٿي اوطارا.
تنهنجي چهري ۾ نور نوراني آ، تنهنجو قول ڪلامِ قرآني آ،
ڪن ثابت ٽيھ سيپارا، تنهنجي نانوَ جا آهن نعرا۔
تنهنجو تاج سڄڻ سلطاني آ، سچ چوان تان راز ربّاني آ،
جنهن ۾ چمڪن سورج تارا، تنهنجي نانوَ جا آهن نعرا.
ڪونين تي تنهنجو سايو آ، ڪري ڀال ڀلا تو ڀانيو آ،
سڀئي قلب اجاريئي ڪارا، تنهنجي نانوَ جا آهن نعرا.
تنهنجو دين دنيا ۾ دائم آ، تنهنجي اسم سان دنيا قائم آ،
ٿيا گدا سڪندر دارا، تنهنجي نانوَ جا آهن نعرا.
توکي شام صبح سي سارين ٿا، صلوٰت پڙهي دل ٺارين ٿا،
هي “وسيم” جهڙا ويچارا، تنهنجي نانوَ جا آهن نعرا.