شل هيل وري قسمت وڃان : نعت رسول مقبولﷺ
شل هيل وري قسمت وڃان يار مديني ڏي،
عاجز کي ڪجان سڏڙو سرڪار مديني ڏي،
محبوب مديني جا مهمان هزارين ٿيا،
مرسل جي در دل سان دربان هزارين ٿيا،
روئي روئي ڏسن مؤمن ڀلي پار مديني ڏي.
هِت منهنجي دوا ناهي دنيا جي دوائن ۾،
مون نيڻ وڇايا ٻئي مدني جي راهن ۾،
سگهو گهوٽ گهرايو هي بيمار مديني ڏي.
تنهنجي در سان لڳو دم آ ڇڏي در هي وڃن ڪاڏي،
پَر وارا پڄن پاڻهي بي پر هي وڃن ڪاڏي،
سي ڪين لڇن جن جو منٺار مديني ڏي.
اچي موت نه ٿو جيسين ڀلو پار پيو گهرندو،
هي “وسيم” محمدﷺ جو ديدار پيو گهرندو،
دم منهنجو وڃي مولا درٻار مديني ڏي.