پکي پيغام منهنجي کي : نعت رسول مقبولﷺ
پکي پيغام منهنجي کي، کڻي وڃ تون مديني ڏي.
ادب سان پار ڏانهن پرڙا، هڻي وڃ تون مديني ڏي،
کڻي گفتا غريبن جا، چڳي داڻان درودن جا.
ڇڏي هي لاڙ جو پاسو، لڙي وڃ تون مديني ڏي.
رکي نيڻن تي نعتن کي، سلامن ۽ صلوٰتن کي.
“نبي” جي شان جي آيت، پڙهي وڃ تون مديني ڏي.
ڪري سرڪار جون ڳالهيون، اکيون پنهنجون ڪجان آليون.
منهنجي طرفان ڪري رڙيون رڙي، وڃ تون مديني ڏي.
ڪريو سڏڙو ڪو سائل کي، گناهن جي ستايل کي.
کڻي نياپو هوائن تي چڙهي، وڃ تون مديني ڏي.
“وسيم” جون مڃي منٿون، وڃي ڦيرو ڪري اچ تون.
گهڻو نه پر پکي هڪڙي گهڙي، وڃ تون مديني ڏي.