سنڌ جهڙا پرين...!!
ساهه جي سلسلن جو سفر
ٿو لڳين!
روح جي راڳ ۾
راحتن جو مڌر ڪوئي سُر
ٿو لڳين!
عشق تُنهنجي اکين جو
حسين خواب آ!
مُرڪ تُنهنجي وفا جو
کُليل باب آ!
تون نئين نينهن جي
ڪائناتن جو آن
ڪو ڪنوارو قصو!
هر وضاحت بڻي آهي
تنهنجو حصو!
تون شبِ زندگيءَ جو
شهر ٿو لڳين!
۽ سُڃي سانجهه ۾
ڄڻ ته گهر ٿو لڳين!
هي اُڃون مُحبتن جون
مُسافر اکيون!
تنهنجي ئي پيار ڏي
پنڌ آڻين پيون!
حُسن تنهنجي اڳيان
ڇا انڌيرا اُٿن!؟
جِتّ سجدن ۾ جُهڪيل
سويرا هُجن!
سرمديءَ جو قسم!
رهزني رات ۾ ڀي
اُجالو لڳين!
بانوري باک جو
سونهن جي ساک جو،
تون لکيل شاهه جو ڄڻ
رسالو لڳين!
تُنهنجي هرهڪ ادا جي
اُفق مان اڃا
دلبرين جا سوين چنڊ اُڀريو اچن
مهڪندڙ موسمن جو لڳين ٿو بدن
سوچ جون سرحدون
ساريون توتي کُٽن
جيءُ توکي چوان
جند جھڙا پرين!
سنڌ جھڙا پرين...!!