شاعري

ڪلا جي ڪائنات ۾

. هي شاعريء جو ڪتاب سنڌ جي خوبصورت شاعر اياز امر شيخ جو لکيل آهي..
Title Cover of book ڪلا جي ڪائنات ۾

هر حُسن آ اڏيءَ تي...!!

آزاد تون هوا سان
او سُونهن جا سنيها
آخر ڪڏهن ته ايندين!؟
سنڌ جا اُداس سپنا
بي موت ٿي مرن پيا
هر باک جي اکين ۾
لُڙڪن جي لهر آهي
چاهت اندر چُڀيون هن
خاموشيون خنجر ٿي
خوشبوءِ کٿوري ڇاڻي
هر گل جي پنکڙيءَ تي
زخمن جي زرد موسم
غم ساڻ گهر اڏيو آ
۽ تڙپ جو تسلسل
تاريخ نئين لکي پيو
ڏس درد سان دڳن تي
اڄ رَت ڪو ڇَٽي پيو
سيني مان سُور جو ڄڻ
سُنبو سِڌو مَٽي پيو
هر حُسن آ اڏيءَ تي
قاتل پيو ماس ڪوري
سچ پيو سڙي هڏيءَ تي
هت پيار جا پيغمبر
فتويٰ هٿان پيا ڦُرجن
مذهب جي آڙ ۾ ڏس
انسان پيا ٿا ڪُسجن
تهذيب پئي ٿي تڙپي
پوءِ ڀي ثقافتن لئه
جاڳيا ثواب ناهن
بندش جي بيرخين سان
وڌيا نقاب آهن
ڪٿ ڀي سلامتيءَ جو
سهرو نه سِر تي آهي
ٿوهر اُهو اُڃارو
بارش نه ٿر تي آهي
اُڃ ۾ ڪنڊي سُڪل آ
ڳيرن جي ڳالهڙين ۾
گيتن جي گونج ناهي
ساڳي سا ٻاٻيهن جي
ٻولين ۾ ٻهڪ ناهي
ڪونڀٽ ڀٽن کي ڀاڪُر
پائي روئُن روزانو
ديبل جي دؤر جھڙا
منظر مري ويا هن
هر رات روپا ماڙي
ويرانين جي وندر
بڻجي ڀُري رهي آ
مڪليءَ جان ماٺ آهي
ڪٿ ڀي پڙاڏو ناهي
سُنسان سانجهيون سڀ
ويري پيو وار ٺاهي
هت چاهه ۽ چپن جي
چانڊاڻ جي بدن کي
بي خوف ذلتن جي
نظرن ڇڏيو آ گهائي
ساري امن جون اکيون
رَت ساڻ ئي رڱيل هن
معصوم مُحبتن کي
ملندو رهيو ڪفن آ
هر ديس دلبريءَ جو
ٿيندو رهيو دفن آ
هت ظلم جي زهر سان
هر ساهه سرد ٿيو آ
جوڀن جي جنتن جو
چهرو ٿي زرد ويو آ
اي سُونهن جي صبا تون...
هاڻي هلي هلي آ!
اچ ڏس اُداسين ۾
سنڌ جي گلي گلي آ!