طَوالت چڱي ناهي
تو مون کي سڀ ڪُجهه ڏئي به
مون کان سڀ ڪُجهه کَسي ورتو آهي
مان تنهنجي تعلق جي ڳچيءَ مان
طوقعاتن جا طوق لاهي
توکي نامنسوبيءَ جي آزادي اَرپيان ٿو
ڇاڪاڻ ته
پنهنجائپ ۾ طوقعاتن جي ڪلپنا رکڻ سان
تعلقن جا ڀَرم ڀُري پوندا آهن
توسان ڪيڏيون نه محبتون هوندي به
تو پاران مليل ڏُکن کي وساري نه سگهيو آهيان
گهاوَ ڀرجي به پنهنجا نيشان باقي ڇڏي ويندا آهن
تو منهنجي معصوم محبت کي جَوان ڪري ڪيڏو نه وڏو اَنياءُ ڪيو
ڏِسُ!
مان هر پل حالتن جي صَليب تي مَصلوب آهيان
تون اَڻڄاڻائيءَ جي موسم ۾ تحليل ٿي ويو آهين
سوچيان ٿو ڏُکن جا پنڌ ڏاڍا وڏا آهن
۽ طَوالت ڪنهن به طور تي چڱي ناهي